ប្រែសម្រួល៖ ស-សម្បត្តិ

ក្រុមអវកាសយានិក Crew-9 ទាំងមូល — អវកាសយានិក NASA លោក Butch Wilmore, Suni Williams និង Nick Hague ព្រមទាំងអវកាសយានិករុស្សី Aleksandr Gorbunov — បានចុះចតដោយសុវត្ថិភាពនៅឆ្នេរសមុទ្រហ្វ្លរីដាកាលពីល្ងាចថ្ងៃអង្គារ។

ក្នុងរយៈពេលមួយម៉ោងបន្ទាប់ពីចុះចតនៅវេលាម៉ោង 5:57 ល្ងាចម៉ោងក្រុងខាងកើត កាប៊ីនរបស់ពួកគេត្រូវបានទាញឡើងមកលើនាវាសង្គ្រោះ ការត្រួតពិនិត្យសុវត្ថិភាពត្រូវបានបញ្ចប់ និងក្រុមអវកាសយានិកចាកចេញពីយានអវកាសរបស់ពួកគេលើកៅអីមានកង់ ខណៈពេលដែលរាងកាយរបស់ពួកគេចាប់ផ្តើមសម្រួលខ្លួនឡើងវិញទៅនឹងជីវិតក្នុងកម្លាំងទំនាញ។

ខណៈពេលដែលពួកគេនៅតែស្ថិតនៅលើនាវាសង្គ្រោះរបស់ SpaceX ក្រុមអវកាសយានិកទាំងបួននាក់ត្រូវបានរំពឹងថានឹងទទួលការត្រួតពិនិត្យសុខភាព ដើម្បីធានាថាគ្មានភាពអាសន្នផ្នែកវេជ្ជសាស្ត្រដែលត្រូវដោះស្រាយ។

បញ្ហាអាចកើតឡើង៖ នៅពេលដែលបេសកកម្ម Crew-8 របស់ SpaceX ត្រឡប់មកវិញកាលពីឆ្នាំមុន ក្រុមអវកាសយានិកទាំងបួននាក់ត្រូវបានដឹកជញ្ជូនទៅមន្ទីរពេទ្យក្នុងរដ្ឋហ្វ្លូរីដាជំនួសឱ្យការត្រឡប់ទៅមូលដ្ឋានផ្ទះរបស់ពួកគេនៅទីក្រុងហូស្តុនភ្លាមៗ ដោយសារតែបញ្ហាវេជ្ជសាស្ត្រដែលមិនត្រូវបានបង្ហាញ។ ជំហាននេះត្រូវបានធ្វើឡើងដោយសារការប្រុងប្រយ័ត្នខ្ពស់ NASA បាននិយាយនៅពេលនោះ។

បន្ទាប់ពីពួកគេត្រួតពិនិត្យសុខភាពរួច ក្រុម Crew-9 នឹងធ្វើដំណើរដោយឧទ្ធម្ភាគចក្រទៅកាន់អាកាសយានដ្ឋាននៅរដ្ឋហ្វ្លូរីដា ដែលពួកគេនឹងឡើងយន្តហោះទៅកាន់ Ellington Field នៅទីក្រុងហូស្តុន។ ផ្លូវអាកាសនេះស្ថិតនៅតាមបណ្តោយផ្លូវពីមជ្ឈមណ្ឌល NASA Johnson Space Center — មជ្ឈមណ្ឌលអវកាសដែលអវកាសយានិកចាត់ទុកជាផ្ទះ។

នៅពេលត្រឡប់មកផ្ទះវិញ ក្រុមអវកាសយានិក NASA នឹងបន្តទទួលការពិនិត្យសុខភាពរហូតដល់ពួកគេត្រូវបានអនុញ្ញាតដោយគ្រូពេទ្យហោះហើរ។

“នៅថ្ងៃដំបូងៗទាំងនេះ…យើងត្រូវបានព័ទ្ធជុំវិញដោយគ្រូពេទ្យហោះហើរដែលមើលថែទាំយើង ហើយយើងកំពុងស៊ាំទៅនឹងជីវិតក្នុងកម្លាំងទំនាញ 1G — ជីវិតត្រឡប់មកភពផែនដីវិញបន្ទាប់ពីអណ្ដែតក្នុងស្ថានភាពគ្មានទម្ងន់អស់រយៈពេលច្រើនខែ” នេះជាសម្តីរបស់អវកាសយានិក NASA លោក Warren “Woody” Hoburg ដែលបានបើកបរយាន SpaceX ក្នុងបេសកកម្ម Crew-6 ក្នុងឆ្នាំ ២០២៣៕